Opozita nis sot protestat për të vënë në zbatim aksionin për mosbindje civile ndaj qeverisë. Për rreth tri orë, akset kryesore të vendit do të jenë të bllokuara, pasi qytetarët dhe deputetët e opozitës do të jenë duke protestuar ndaj qeverisë dhe rritjes së vazhdueshme të taksave.
Opinion.al ka mësuar se kryetarja e LSI, Monika Kryemadhi është nisur për në Elbasan për tju bashkuar protestuesve që në orën 10:00 mblidhen tek kryqëzimi i Brandasheshit. Po kështu lideri i PD, Lulzim Basha do të jetë me protestuesit në kryqëzimin e Vlorës.
Sot pritet që nga ora 10:00 deri në orën 13:00 të bllokohet kryqëzimi i Milotit që lidh Tiranën me Shkodrën dhe njëkohësisht edhe Rrugën e Kombit me kryeqytetin. Në të njëjtin orar do të jetë i pakalueshëm për mjetet edhe kryqëzimi i Çermës në Lushnjë, që do të paralizojë lëvizjen në Jug të vendit.
I bllokuar do të jetë edhe kryqëzimi i Bradasheshit në Elbasan dhe kryqëzimi i Vorës në Tiranë. Në çdo protestë do të ketë përfaqësues të opozitës, pra PD dhe LSI.
