Në bashkinë e Mallakastrës ka nisur puna për rehabilitimin e rrugës Hekal-Klos.
Lajmin e ka bërë të ditur zëvendëskryeministrja, Belinda Balluku, ku së bashku me kryetarin e bashkisë Mallakastër, Qerim Ismailaj kanë ndjekur nga afër punimet, të cilat parashikohet të përfundojnë brenda tetë muajve.
Rehabilitimi i kësaj rruge i shërben zhvillimit të mëtejshëm të bujqësisë dhe blegtorisë së zonës.
“Nuk do të jetë thjesht një rrugë e cila shtrohet, por edhe zgjerohet. Zgjerohet nga 3.5 në 4.5 metra dhe nga ana tjetër kemi eliminimin e kthesave që është pjesë shumë e rëndësishme. Pastaj edhe pastrimin e kanaleve”, u shpreh Balluku.
Në zonë tashmë ka nisur edhe hapja e njësive të para të agroturizimit, ndaj përmirësimi i infrastrukturës do ta kthejë atë në një destinacion edhe më të vizituar.
“Duhet dialog i hapur dhe i vazhdueshëm me banorët për ti shpjeguar atyre sesi funksionojnë edhe paketat mbështetëse për agroturizmin, edhe sesi mund të promovojmë më tej të gjitha vlerat e kësaj zone, që nuk ka të bëjë vetëm me agroturizimin edhe me parqet arkeologjike dhe nga ana tjetër të mos harrojmë që para së gjithash infrastruktura rrugore apo infrastruktura energjetike është në funksion të banorëve”, tha Balluku.
Rruga Hekal-Klos ka një gjatësi prej afro 3 kilometrash.
