Në ambientet e Ministrisë së Mbrojtjes u prezantua sot struktura e Autoritetit për Informimin në Dokumentet e ish-Sigurimit të Shtetit. E para dosje që u hap ishte ajo e Musine Kokalarit.
Drejtuesja e këtij autoriteti Gentiana Sula deklaroi që janë marrë 3 kërkesa për pastrimin e figurës.
“Së pari jemi bërë gati dhe kemi prioritet t’u japim informacion institucioneve publike nëse duan informacion për pastërtinë e figurës. Sot kemi marrë 3 kërkesa për pastrimin e figurës. Së dyti, japim informacion për familjarët e personave të dënuar ose ata vetë. Kemi marrë një kërkesë për Musine Kokalarin dhe ndihemi mirë që është ajo e para. Po ndërtojmë një projekt të mirë për dixhitalizimin e plotë. Ky do të jetë një institucion i memories”, tha Sula.
Familjarë të Kokalarit, të pranishëm në këtë aktivitet u shprehën se kjo është një dhuratë e pazakontë që do t’i bëhet Musinesë në 100-vjetorin e lindjes me 10 shkurt.
