Partia Demokratike ka nisur protestën e lajmëruar në ditën e sotme përballë Kryeministrisë.
Protestues dhe anëtarë të Partisë Demokratike nga e gjithë Shqipëria janë nisur drejt Tiranës që herët në mëngjes.
Nga Gjirokastra, Berati, Fieri, Kukesi, Korça dhe Elbasani, i janë përgjigjur thirrjes së kreut të Partisë Demorkatike qindra qytetarë të cilët, janë nisur drejt kryeqytetit me dhjetëra furgona e autobusa.
Demokratët gjatë gjithë kësaj kohe kanë bërë disa protesta kundër kryeministrit Rama, por asnjëherë ato nuk janë veshur me kaq mister sa kjo e 18 shkurtit.
Kreu i PD-së, Lulzim Basha ka bërë me dije se janë qytetarët ata të cilët do të vendosin kohëzgjatjen dhe mbarimin e protestës.
Protesta do të jetë paqësore, pavarësisht nëse vendimi i madh do të jetë për një qëndrim të gjatë përpara Kryeministrisë, apo për zgjerim të protestës në të gjithë vendin.
Nuk dihet se cilin skenar do të vendosë kreu i PD-së, Basha, ngujim në shesh, apo protestat e vazhdueshme, por ajo që duket nga foto janë masat e marra nga organizatorët.
Nga sa duket në sheshin para zyrës së Ramës, ogranizatorët po zbarkojnë nga makinat materialet e nevojshme si skela dhe çadra.
Demokratët e lidhin këtë vendim me një përpjekje për të detyruar kryeministrin Rama të japë dorëheqjen.
Opozita e akuzon kryeministrin për mungesën e vullnetit për realizimin e zgjedhjeve të lira e të ndershme, por nga skenari i 18 shkurtit tani për tani njihet vetëm koha e nisjes së protestës. Se çfarë mund të ndodhë më pas, kjo është në dorë të orëve në vazhdim…
Policia njoftoi një ditë më parë se nuk ka informacione për akte dhune gjatë protestës. Sot do të angazhohen rreth 2 mijë efektivë të komisariateve dhe Forcave të Ndërhyrjes së Shpejtë.
Si rrjedhoje e masave të marra në kuadër të protestës, do të këtë bllokime të kufizuara në Bulevardin “Dëshmorët e Kombit” dhe në disa akse që lidhen me të.
