Ka nisur këtë të martë zyrtarisht procesi i zgjedhjes së presidentit të ri. Konferenca e Kryetarëve është mbledhur për të vendosur datën kur do të zhvillohet raundi i parë i votimit për zgjedhjen e Presidentit të ri.
Në nisje të mbledhjes kreu i grupit parlamentar të PS-së, Taulant Balla, tha se propozimi i socialistëve është që votimi i parë të zhvillohet në datën 16 maj. Sipas tij, kjo datë është e përshtatshme dhe brenda afatit që ka përcaktuar Kushtetuta.
“I qëndroj propozimit të bërë për të bërë votimin e parë në datën 16 maj në orën 17:00. Kjo datë është një datë e përshtatshme dhe brenda afatit që ka përcaktuar Kushtetuta”, tha Balla.
Sipas Kushtetutës, procedura për zgjedhjen e presidentit duhet të nisë 60 ditë përpara mbarimit të mandatit presidencial, ndërsa raundi i parë i votimit zhvillohet jo më shumë se 7 ditë nga fillimi i saj.
Gjithsej zhvillohen pesë raunde votimi, ku tre të parat kërkojnë një shumicë të cilësuar prej 84 votash për zgjedhjen e presidentit, ndërsa për dy raundet e fundit nevojitet një shumicë e thjeshtë, 71 vota./Opnion.al
