Shkollat e Tiranës janë institucionet e para arsimore ku janë hapur kabinetet e reja dentare dhe ka nisur kontrolli i shëndetit oral dhe i syve për fëmijët e moshës 6-14 vjeç.
Kryetari i Bashkisë së Tiranës, Erion Veliaj dhe Ministrja e Shëndetësisë dhe Mbrojtjes Sociale, Ogerta Manastirliu, ishin në shkollën 9-vjeçare “Vasil Shanto”, për të inspektuar laboratorin e ri dentar, ku folën për rëndësinë e kontrollin shëndetësor të fëmijëve.
Gjatë fjalës së tij Veliaj tha se ky projekt do të shtrihet në të gjithë shkollat e kryeqytetit.
“Dua t’i nxis prindërit që të mos i lënë pas dore këto kontrolle për fëmijët e tyre, ta marrin seriozisht rekomandimin nëse duhet rregulluar një dhemb apo nëse duhet bërë një korrektim i syzeve për sytë. Plani është që të shkojmë në të gjitha shkollat, por për momentin e kemi nisur me një shkollë në qendër të qytetit, si shembull për të tjerat. Jam i sigurt nga ajo që pashë se nisma do të jetë një histori suksesi”, deklaroi Veliaj.
Veliaj shtoi se, paralelisht me pajisjen me laboratorë mësimorë, shkollat e reja në kryeqytet po pajisen edhe me laboratorë dentarë. “Nëse fokusohemi te çerdhet e kopshtet, fillimisht për t’i rindërtuar, rikonstruktuar, izoluar, apo t’u hiqnim lagështirën, e mandej ndryshuam dietën ushqimore, tregojmë se po ndërtojmë bazat e shoqërisë së nesërme. Me ndihmën e qeverisë po bëjmë edhe fushatën më të madhe të ndërtimit të shkollave të reja, që nga koha e Pavarësisë. Vetëm në Tiranë kemi 40 shkolla të reja, të cilat jo vetëm kanë kabinete të reja të informatikës dhe terrene të mira sportive, si këtu te “Vasil Shanto”, por tani edhe me kabinete dentare. Pra, fëmijët jo vetëm mësojnë, por merren me sport, mësojnë një kurs, tani bëjnë falas edhe kontrollin e syve dhe të dhëmbëve”, tha ai.
Veliaj theksoi se edukimi shëndetësor që në moshë të vogël është një fillim i mirë për një shoqëri shumë herë më të shëndetshme në të ardhmen.
Ndërkohë në fjalën e saj ministrja e Shëndetësisë, Ogerta Manastirliu tha se nisja e dy programeve të reja, atij të kujdesit oral dhe kujdesit të syve, do i shërbejnë jo vetëm shëndetit të fëmijëve, por edhe edukimit të tyre shëndetësor.
“Kemi filluar një program shumë të rëndësishëm, i cili po shtrihet në 10 shkolla të Tiranës. Kemi organizuar një program pilot për kujdesin oral, duke vendosur në 10 shkolla 10 kabinete dentare, që do kujdesen për edukimin shëndetësor, për të gjitha ekzaminimet e nevojshme apo trajtimet për fëmijët, që kanë nevojë të kujdesen edhe më shumë. Ne e dimë shumë mirë që përmes kujdesit oral shmangim shumë sëmundje. Duke e pilotuar në Tiranë, duam që këtë model ta shtrijmë në të gjithë Shqipërinë. Nga ana tjetër, qeveria shqiptare përpara pak javësh, ka miratuar një tjetër program, programin e kujdesit të tyre”, tha Manastirliu./Opinion.al
