Në Parkun Kombëtar Divjakë-Karavasta, ka nisur censusi i shpendëve dimërues ujorë për vitin 2025.
Në të morën pjesë katër ekipe numëruesish të cilët vëzhguan në pika të ndryshme shpendët ujorë.
Sipas tyre, zona Divjakë-Karavasta ka numrin më të madh të shpendëve ujorë në Shqipëri, mesatarisht 36 mijë individë. Këtë vit numri është ulur paksa për shkak të ndryshimeve klimaterike në të gjithë Ballkanin, por edhe të ndërhyrjes së njeriut nëpër ekosisteme si ndotja apo urbanizimi.
Numri më i lartë i shpendëve të regjistruar ka qenë në vitin 2002 me 82 mijë shpendë të egër. Pelikani kaçurrel zë vendin e parë për numrin më të lartë të tyre që jetojnë në ujërat e lagunës së Divjakë-Karavastasë.
Moratoriumi nuk ka arritur të mbrojë speciet e egra, për shkak të zbehjes së bashkëpunimit mes policisë dhe zonave të mbrojtura përderisa vazhdon gjuetia rregullisht. Sipas ekspertit ornitolog Taulant Bino, efekti ishte vetëm 2 vitet e para, tashmë gjuetia kryhet pa kriter.
Pelikani kaçurrel, shqiponja e kenetës, çafkat, bilbili i ujit etj, janë shpendët që ndeshen më së shumti në Divjakë. I gjithë ekosistemi duhet ruajtur nga ndotjet.
Që prej vitit 2015, në këtë proces janë përfshirë rregullisht administratat e zonave të mbrojtura. Këtë vit censusi do të drejtohet nga 7 ekspertë dhe në të do të përfshihen stafet e 12 agjencive të zonave të mbrojtura shqiptare, si edhe vullnetare.
Censusi në Shqipëri është pjesë e censusit ndërkombëtar të shpendëve ujorë dhe kryhet në mbi 140 vende të botës.
Klan News
