“Të ishte diskutuar, të bëhej si paralajmërim dhe të flitej me ndërkombëtarët. Në 2001 kreu i PD mbushi një valixhe me prova dhe shkoi bindi ndërkombëtarët”. Kështu do të deklaronte analisti Preç Zogaj të mërkurën në emisionin Opinion, mbi vendimin e PD-së për të djegur mandatet e deputetëve.
Dhe siç duket opozita e ka nisur aksionin e saj për të bindur ndërkombëtarët, se vendimi i tyre ishte më i drejti në situatën ku ndodhet vendi. Vlen të kujtojmë se që nga Uashingtoni dhe Brukseli kanë ardhur mesazhe kundër këtij akti të opozitës. I pari që mori rrugën për të bindur ndërkombëtarët ishte Lulzim Basha, i cili zhvilloi një takim në Vjenë me përfaqësuesit e PPE në OSBE ku ishin të pranishëm edhe anëtarë të Senatit dhe Kongresit amerikan. Në Tiranë nga ana tjetër, drejtuesit e PD-së zhvilluan një takim me delegacionin parlamentar çek.
Zyrtarët e lartë të PD, informuan delegacionin çek mbi situatën politike në Shqipëri dhe sqaruan parlamentarët e vendit anëtar të BE, se “djegia e mandateve ishte e vetmja rrugë që i kishte mbetur opozitës”.
“Delegacioni çek u informua edhe për të gjitha skandalet e qeverisë Rama, sidomos për rastet e identifikuara dhe të provuara nga hetime zyrtare për blerjen masive të votës nga element të krimit të organizuar për llogari të Partisë Socialiste në pushtet”, theksohet në një deklaratë nga zyra e PD-së.
Sa rezultat do të kenë këto takime, të presim dhe të shohim vendimin e ndërkombëtarëve. Por historia ka treguar se qëndrimet e ndërkombëtarëve ndryshojnë në varësi të zhvillimit të ngjarjeve, por mbi të gjitha të mbështetjes në popull që mund të ketë opozita. /G.F Opinion.al
