Qyteti i Korçës do të dërgojë në parlament 10 mandate përmes votës së qytetarëve. Gazetarja Daniela Zisi raporton se thuajse të gjitha qendrat e votimit kanë vijuar normalisht me procesin. Vonesa janë raportuar në dy qendra votimi, në fshatin Sovian në Maliq dhe në shkollën “Mësonjëtorja e parë shqipe” në qytetin e Korçës.
Procesi i votimit është vonuar për një orë për shkak të problemeve me pajisjet e identifikimit elektronik, por tanimë problemi është zgjidhur në të dyja qendrat.
“Procesi ka nisur normalisht normalisht thuajse në të gjitha qendrat e votimit. Ka pasur problematika të vogla në pajisjet identifikuese të kartave biometrike. Për rreth një orë është ndërprerë procesi në qendrën e votimit në fshatin Sovian të bashkisë së Maliqit për shkak të problemeve me pajisjen biometrike. Para pak minutash procesi ka nisur normalisht. Po ashtu me një orë vonesë ka filluar procesi në qendrën e votimit në shkollën “Mësonjëtorja e parë shqipe” në qytetin e Korçës, por edhe ky problem është tejkaluar. Në të 6 bashkitë e qarkut të Korçës, në të 420 qendrat e votimit momentalisht procesi vijon normalisht dhe në qetësi. Ka pak votues nga sa kam parë në qendrat e votimit. Votuesit e parë janë të moshave të treta, ndërkohë që pritet një fluks rreth orës 10-11”, pohoi gazetarja. Tv Klan
