Dhjetëra miliona euro të fituara në tendera direktë apo të “bekuara” nga KPP për nipin e deputetit socialist Sadri Abazi.
Firma “Alko Impex” me pronar Arbër Abazin, djalin e vëllait të deputetit Sadri Abazi ishte thuajse e panjohur deri në vitin 2014, kur dhe nisi të ishte fituese në tenderat e bashkive të drejtuara nga socialistët edhe pse në fakt rezulton e regjistruar që në vitin 2011.
Vetë deputetit Sadri Abazi i njohur si pronar i firmës “Usluga” i detyruar nga ligji, pas zgjedhjes si deputet ua dorëzoi aksionet e tij familjarëve pas hyrjes në parlament. Ky moment duket se shënoi dhe nisjen e suksesit për nipin e tij që në më pak se tre vjet arriti të fitonte plot 100 milionë euro tendera kryesisht në pastrimin e qyteteve apo ndërtime.
Tabela tregon dhe aktivitetin e firmës “Alko Impex” në këtë periudhë kohore. Edhe pse shumë prej tenderave të fituara u kontestuan nga firmat e tjera që morën pjesë në konkurim, askush në APP nuk e vuri ujin në zjarr për nipin e deputetit, i cili ndërkohë rezulton me degë qëndrore të kompanisë “Alko Impex” të regjistruar në Prishtinë dhe në tenderat shqiptarë prezantohet me dokumentacion si degë e Kosovës.
Kjo manovër i ka dhënë avantazh firmës “Alko Impex” që të prezantojë në konkurime në Shqipëri dhe stafin kosovar të kompanisë mëmë.
Në vijim mund të shihni emrat e drejtuesëve teknikë që ka deklaruar kompania e zotit Arbër Abazi.
Një verifikim i thjeshtë në portalin online të qeverisë së Kosovës rezulton se nga 8 drejtues teknikë që ka deklaruar kjo kompani, vetëm një prej tyre rezulton i licencuar pranë autoriteteve shtetërore kosovare.
Personave të tjerë nuk u përputhen të dhëna dhe sistemi elektronik nuk gjeneron të dhëna konfirmuese për ta.
Më poshtë mund të shihni rezultatin negativ që gjeneron regjistri online i Kosovës.
Por këtë verifikim elementar siç duket as ministria e Gjiknurit dhe as bashkitë e Tiranës, Kavajës etj. nuk janë munduar ta bëjnë.
Favorizimi klientelist që i bëhet kësaj kompanie është veç njëra anë e medaljes, pasi verifikimi i emrave të drejtuesëve teknikë të kësaj kompanie në sistemin elektronik, hedh dyshime të bazuara se licencat e stafit teknik të saj mund të jenë të rreme dhe të falsifikuara.
Burimi: Hashtag.al
