Viti i ri shkollor do t’u dedikohet mësuesve. Pas largimit të atyre pa arsimin e duhur apo jashtë profilit, vëmendja do të përqendrohet në kualifikimin e mësuesve në sistem. Këtë vendosmëri shprehu ministrja e Arsimit, Lindita Nikolla, në urimin e saj për të gjithë nxënësit e mësuesit që nisin sot vitin shkollor 2016- 2017.
“Ky vit do të jetë viti dedikuar mësuesit. Pasi vendosëm sistemin e punësimit sipas meritës, dhe jo teserës apo xhepit, do të vijojmë bashkërisht me sistemin e kualifikimit real e jo pazareve të krediteve fiktive, si dhe përmirësimit të kushteve tuaja”.
Ndërsa 1500 mësuesve që u punësuan falë portalit “mësues për Shqipërinë”, Nikolla iu kërkoi të gjejnë po aq arsye për të përmirësuar cilësinë e mësimdhënies, rrjedhimisht të dijeve që marrin nxënësit e tyre. Një vend të veçantë në urimin e ministres zënë fëmijët, veçanërisht ata në nevojë, për të cilët premtoi se këtë vit do të bëhet më shumë. “Zotohemi se do të bëjmë më shumë për ju krahas gjithë fëmijëve të tjerë. Po ndërtojmë hap pas hapi vetëdijen për ta ndryshuar mënyrën e të nxënit që ju është ofruar deri më sot, me të nxënit për të cilin ju keni nevojë”, nënvizoi Nikolla.
Duke u ndalur te tekstet shkollore, ministrja vuri në dukje një hap pozitiv, që është përmirësimi i kurrikulës së gjimnazit, duke e përafruar me studimet universitare.
“Ju që filloni klasën e dhjetë do të filloni kurrikulën e gjimnazit të gjeneratës tjetër, që lehtëson ngarkesën nga 18 në 13 lëndë mësimore, që rivendos gjuhën shqipe dhe unifikon lëndët e detyrueshme deri në klasën e 11-të dhe që vendos vetëm 5 lëndë të detyrueshme në maturë, si dhe mundëson lidhjen e munguar midis gjimnazit dhe arsimit të lartë”.
Veç kësaj, 155 mijë nxënës do të mësojnë këtë vit me tekste të reja europiane e shumë të tjerë me tekste dixhitale falë projektit pilot që do të zbatohet këtë vit vetëm në 60 shkolla. Në semestrin e dytë, dhjetë shkolla kryeqytetase do të kenë një lëndë të posaçme për kulturën fetare, projekt që vitin tjetër parashikohet të shtrihet në të gjitha shkollat vendase.
