Duket se konflikti virtual mes ish ministres së Arsimit Lindita Nikolla dhe nr. 2 të LSI-së për Tiranën Kejdi Mehmetaj, nuk ka të mbaruar. E nisi Nikolla me statusin kilometric kundër 24 vjeçares, më pas erdhi kundërpërgjigja e Kejdit, e cila ishte me tone të ashpra, dhe së fundmi përsëri një përgjigje e Nikollës.
Në statusin e fundit, Nikolla e ka quajtur Kejdin të paedukatë dhe madje shprehet e penduar për vlerësimin e mëparshëm karshi deputetes së LSI-së. Në fund Nikolla shprehet se ky është komunikimi i tyre i fundit publik dhe e “fton” të rishihen pas 25 qershorit.
Statusi i plotë i Nikollës:
Kejdi, mesa duket nuk e kisha kuptuar se ke hyrë shumë thellë në rrugën e gënjeshtrave. Ti je shumë larg të qenit e edukuar në raport me të vërtetën!
Më vjen sinqerisht keq që paskam gabuar në vlerësimin tim në lidhje me ty. Gabimet e tua i kam menduar si mungesë përvoje dhe formimi, kur në fakt janë mungesë respekti për të vërtetën.
Unë e dashur Kejdi, Fakultetin e Shkencave të Natyrës, të Universitetit të Tiranës, e kam përfunduar në vitin 1989. Që nga koha kur jam bërë pjesë e politikës, mund të kem bërë gabime sa të duash, por kurrë nuk kam gënjyer. Çdokush bën zgjedhjet e veta: ti me gënjeshtrat si shans për të gjithë, unë me të vërtetat si sjellje me të gjithë. Këtu mbaron edhe komunikimi ynë publik. Le të presim 25 qershorin për të tjerat.
