Ministrja e Arsimit, Lindita Nikolla teksa ndodhej në një takim me prindër dhe mësues në Kavajë për problematikën e shkollave, artikuloi qartë disa rregulla të reja që do të ndërmerren nis nga viti i ri shkollor 2018-2019 (në shtator). Ajo tha se do të rikthehen inspektimet (kontrollet) në shkolla. Do u ndalohen celularët mësuesve si dhe do vështirësohet testimi, pasi sipas saj 60 për qind e të diplomuarve në mësuesi nuk e kalojnë provimin e shtetit.
Fjala e ministres, Lindita Nikolla:
“Që me vitin e ardhshëm shkollor ne rikthejmë inspektimin në çdo shkollë të Shqipërisë. Do të jetë syri monitorues i standardeve dhe problematikave, i ngritjes së alarmit, jo kur të ketë mbaruar viti shkollor dhe kur të shohim përmes mediave ndonjë mësues që dhunon apo ndonjë mësues që abuzon me detyrën por do të kemi gjithë informacionin në kohë reale për të ndërhyrë në kohë reale për të gjitha këto problematika”.
Masat
“Mësuesve do ju ndalohet hyrja në orë të mësimit me celularë, ne do ecim edhe më shumë tek nxënësit por ky është parakushti i parë”, deklaroi Nikolla.
Niveli i dobët
“Unë nuk mund të mbyll sytë dhe të bëj sikur nuk shoh kur në provimin e shtetit ngelin edhe 60% e të diplomuarve në fakultetet tona. Mendoni janë studentë që kanë shpenzuar 5 vite nga jeta e tyre për të mbaruar “Bachelor” dhe “Master” në mësuesi, kanë bërë një vit praktikën profesionale dhe vijnë dhe ngelin në provimin e shtetit. Reforma jonë e mësuesisë besoj do të fillojë dhe t’i japë frytet e veta. Portali “Mësues për Shqipërinë” nuk do të lejojë më që në shkolla të shkojnë mësues pa arsimin përkatës, mësues të dobët, mësues që i zgjedh politika dhe ministrja dhe jo merita e tyre dhe nga ana tjetër ne nuk do çojmë drejt universiteteve maturantët më të dobët”, tha ajo.
/Opinion.al
*Në foto: Ministrja ne Kavaje
