Nicola Zingaretti do të jetë kreu i ri i Partisë Demokratike italiane. Partia e majtë italiane ka mbajtur dje zgjedhjet e brendshme për të zgjedhur njeriun që do t’i drejtojë në betejën politike kundër aleancës qeverisëse mes Lëvizjes Pesë Yjet dhe Lega Nord.
Sipas të dhënave paraprake, Zingaretti ka fituar rreth 65% të votave. Dy sfidantët e tjerë, kreu aktual i partisë Maurizio Martina dhe Roberto Giachetti kanë uruar Zingarettin për fitoren, duke i premtuar bashkëpunim të mëtejshëm.
53-vjeçari Nicola Zingaretti prej vitit 2013 është President i rajonit të Lacios. Ai ka qenë gjithashtu deputet në Parlamentin Europian, si edhe kryetar i të Majtës Rinore në vitet 1992-1995. Zingaretti konsiderohet si një politikan me bindje të thella socialdemokrate dhe është menduar si figura që do të bashkojë të majtën italiane.
Pas qeverisjes katër vjeçare, në zgjedhjet e vitit të kaluar Partia Demokratike italiane kaloi në opozitë, me rezultatin më të ulët zgjedhor që nga krijimi në vitin 2007./Opinion.al
