Babai i radikalit fetar, Xherxh (Gjergj) Laçit, Nazif Laçi në një intervistë për mediat ka deklaruar se i biri nuk e ka dhunuar gruan dhe fëmijët e tij.
Ai rrëfen se i biri, bashkëshortja dhe fëmijët e tij nuk punonin dhe bukën e gojës ia kanë siguruar familjarët.
Po ashtu Nazif Laçi thotë se Xherxh (Gjergj) Laçi, vuan nga probleme të shëndetit mendor dhe se nuk duhet të qëndrojë në burg , por në spital.
“Nuk ka mundësi të jetë radikal, çdo të premte shkonte dhe falej në xhami. Ai njeri më i drejtë dhe më i sinqertë nuk ka më. Punonte me ndershmëri. Ai merrej si ustallar, shtëpinë e ka bërë vetë. Nuk i ka prekur me dorë as gruan dhe as fëmijët. Jam dëshmitar unë se çdo ditë vija këtu. Unë jetoj me Halilin, një djalë tjetër. Ai nuk ka punuar as në firma dhe as në ndërmarrje, bukën e gojën ia kemi sjellë ne, familjarët. E kishte si ves të vetin, nuk e linte as gruan dhe as vetë në punë. I kishte mbetur fiksim nga diabeti që e ka goditur në tru. Ai as vetë nuk punonte, por nuk i linte as të tjerët dhe kështu arriti puna e madhe. Ka pasur probleme të shëndetit mendor që herët se ky ka qenë me letra të Italisë, i la letrat dhe erdhi vetë me këmbët e veta. La çdo gjë dhe këtu nuk punoi, sëmundja e ka fajin. Ai duhet të shkojë në spital dhe jo në burg siç e kanë lënë këta dhe e kanë lënë 3 ditë pa insulinë, duke vdekur mbrëmë, ia kemi çuar insulinat tek 3-shi se kanë qenë duke e lënë policët duke vdekur”– tha babai i Xherxh Laçit.
Gjatë marrjes në pyetje, Laçi ka mohuar të ketë dhunuar bashkëshorten e tij si dhe dy djemtë, Albanin dhe Sulltanin, përkatësisht 15 dhe 17 vjeç. 50-vjeçari Laçi ka dëshmuar para oficerëve të Policisë dhe të Antiterrorit se nuk i linte fëmijët të dilnin nga banesa për t’i ruajtur nga e keqja.
“Kam ndjekur parimet e mia fetare. Fëmijët dhe bashkëshorten nuk i kam lënë të dalin për t’i ruajtur nga e keqja. Nuk doja që ata të nisnin drogën apo të infektoheshin”, ka pohuar Laçi.
Por krahas dëshmisë së tij, dy djemtë dhe nëna e tyre kanë treguar në prani të psikologëve se ata dhunoheshin sistematikisht. Tanimë ata janë dërguar në një qendër rehabilitimi.
