Bora që ra gjatë natës ka krijuar probleme në rrugë. Nga ngrica dy makina janë përplasur në rrugën Maqellarë-Shupenzë. “Në vendin e quajtur ‘Rotonta’, aksi Maqellarë-Shupenzë, është përplasur mjeti tip “Benz” me drejtues shtetasin Gj.M, banues në Gjoricë, Bulqizë me mjetin tip “Opel”, me drejtues shtetasin G.M, banues në Bllatë, Dibër”, njofton policia. Policia bën me dije se dy të lënduarit po marrin ndihmë mjekësore në Spitalin e Peshkopisë dhe ndodhen jashtë rrezikut për jetën.
“Për pasojë është dëmtuar lehtë pasagjeri B Xh, 50 vjeç, banues në Gjoricë, që udhëtonte me mjetin tip “Benz”, si dhe drejtuesi i mjetit tip “Opel” shtetasi G.M, 32 vjeç”, thuhet më tej. Nga të dhënat e para shkak për aksidentin është bërë akulli në rrugë.
