Presidenti Ilir Meta ka reagua lidhur me ngjarjet e fundit në vend, dhunimi i një biznesmeni në Nikël dhe vrasja e një tjetër sipërmarrësi në Fier.
Përmes një publikimi në Facebook, Meta i cilëson ngjarjet kërënim serioz për rendin dhe sigurinë e jetës në vend, por edhe për zhvillimet ekonomike.
“Dënoj me forcë aktet tepër të rënda kriminale të ditëve të fundit, vrasjen e biznesmenit Backa në qendër të Fierit, si dhe grabitjen dhe torturimin e biznesmenit Çangu në Nikël të Krujës.
Këto ngjarje, që kanë tronditur thellë opinionin publik, përbëjnë një kërcënim serioz për rendin, sigurinë e jetës dhe pronës së qytetarëve, por edhe për zhvillimet ekonomike dhe sociale të vendit”, shkruan presidenti duke u bërë thirrje autoriteteve përkatëse ligjzbatuese për kapjen e autorëve.
“I bëj thirrje Policisë së Shtetit, Prokurorisë, Shërbimit Informativ të Shtetit, si dhe të gjithë institucioneve të tjera ligjzbatuese në vend, të forcojnë bashkëpunimin për arrestimin e menjëhershëm të autorëve me rrezikshmëri të lartë dhe vënien e tyre para drejtësisë, por edhe për të marrë të gjitha masat efektive për të parandaluar ngjarje të tilla të rënda dhe tronditëse kriminale”, përfundon Presidenti./Opinion.al
