Kosova formalizon padinë ndaj Rumanisë, për ngjarjet e papranueshme të Bukureshtit gjatë ndeshjes kualifikuese të “Euro 2024”. Dardanët kërkojnë nga UEFA, por edhe nga organet e tjera kompetente, dënime drastike për rumunët.
Federata e Futbollit të Kosovës njoftoi se ka mbledhur deklarata, materiale dhe fotografi, të cilat iu bashkangjitën dosjes dhe do t’i paraqesë ato te UEFA, por edhe në Gjykatën e Arbitrazhit Sportiv në Lozanë.
Në minutën e 18, ndeshja u ndërpre pas thirrjeve diskriminuese nga tifozët ultras të Rumanisë, që njihen edhe si Brigada “Të bashkuar për trengjyrëshin”. Pas ofendimeve dhe mesazhit “Kosova është Serbi”, ndeshja u pezullua për afro një orë, me arbitrin që largoi ekipet nga fusha.
Kosova protestoi vazhdimisht që ndeshja të mos vijonte dhe kërkoi fitoren në tavolinë. Një pretendim që tashmë do të ndiqet në rrugë ligjore, fillimisht duke kaluar nga komisionet Disiplinore të UEFA-s dhe më tej, nëse duhet, në KAS-in e Lozanës.
FFK mund të përdorë si argument mbështetës edhe imazhet video të publikuara në Rumani, që konfirmojnë përfshirjen e shtetit në skandalin e ndodhur. Sipas kapo-grupit të ultrasve rumunë, Andrei Preda, “baneri me mesazhin kundër Kosovës është kontrolluar nga xhandarmëria dhe u lejua të futej në stadium”. Rrethana të cilat do t’i shkojnë në ndihmë Kosovës, për të vendosur drejtësinë në vend.
