Prokuroria e Krimeve të Rënda asnjëherë nuk ka publikuar vendimet e mosfillimit, pushimit dhe transferimit të dosjeve në Prokurorinë e Elbasanit për ngjarjet e fundit, ku autorët e këtyre ngjarjeve, rezultojnë të përfshirë në vrasje, trafik droge dhe sulm me armë ndaj policisë.
Përmes një shënimi në Facebook, gazetari Flamur Vezaj deklaron se nuk është mirë që e gjithë pesha e fajit të hidhet mbi policinë, pasi pjesë e krimit është edhe Prokuroria.
“Kjo prokurori asnjëherë nuk publikon vendimet e mosfillimit, pushimit apo dhe transferimit të dosjeve në Prokurorinë e Elbasanit për ngjarjet e fundit, ku janë të përfshirë po këta individ si në vrasje, sulm me armë ndaj policisë, drogën e ‘garantuar’ në spedicionin e bashkëshortes së kreut të Bashkisë së Elbasanit apo dhe hetimet për ngjarjet e fundit kriminale”, thekson Vezaj.
Sipas tij, ryshfetet dhe të mirat materiale, kanë bërë që shumë prokurorë të tradhtojnë njëri-tjetrin dhe të bashkëpunojnë me eksponent të rrezikshëm të botës së krimit.
“Kështu që faji nuk mbetet vetëm i policisë, por edhe i Prokurorisë që në disa raste për inat të shefave apo dhe të mirave materiale, kanë tradhtuar njëri-tjetrin tek personat me rrezikshmëri shoqërore ose thënë ndryshe kriminel, duke ia pushuar çështjet apo arkivuar në heshtje”, shkruan ai.
