Policia arriti sot të vërë në pranga dy tritolvënësit e Elbasanit që tronditën qytetin gjatë muajit Maj.
Ata janë Gentian Kllogjri dhe Thanas Thoma, të dy të akuzuar për vendosjen e tritolit në dy ngjarje të ndryshme.
Klogjri dhe Thoma akuzohen se në 6 maj vendosën një sasi tritoli poshtë një automjeti në Lagjen “Luigj Gurakuqi”, ndërsa në 22 maj vendosën lëndë plasëse në shkallët e një lokali në lagjen “Emin Matraxhiu”.
Sipas policisë dyshime se qëllimi i vendosjes së tritolit ka qenë paralajmërimi.
Autorët e vendosjes së tritolit prej 15 vitesh jetojnë në emigracion e ktheheshin herë pas here. Ata njihen si persona me precedentë penale.
Dy 38-vjeçarët frekuentonin shoqëri të përbashkët me dy pronarët e lokaleve.
Mësohet gjithashtu se edhe pronari i automjetit ka në pronësi një lokal në Elbasan, ashtu si Besnik Braka, i njohur ndryshe edhe si Nik Vojaçek i dënuar edhe më herët.
Njoftimi i policisë
Zbardhet ngjarja e vendosjes së lëndës plasëse në tokë poshtë një automjeti
Gjithashtu zbardhet edhe ngjarja e vendosjes së lëndës plasëse në shkallët e një lokali
Kapen dhe ndalohen dy shtetas
Specialistët e Sektorit të Krimeve të Rënda, në Drejtorinë Vendore të Policisë Elbasan finalizuan me sukses operacionin policor të koduar eksplozivi.
Si rezultat i një hetimi intensiv të përbashkët të zhvilluar me Prokurorinë Pranë Gjykatës së Shkallës parë Elbasan u bë ndalimi i shtetasve:
Gentian Kllogjri, 38 vjeç banues në Elbasan
Thanas Thoma, 38 vjeç banues në Elbasan
Ndalimi i tyre, u bë pasi;
Më datë 06.05.2017 në Lagjen ‘Luigj Gurakuqi” dyshohen të kenë vendosur lëndë plasëse në tokë poshtë mjetit në pronësi të shtetasit F.V.
Më datë 22.05.2017 në Lagjen “Emin Matraxhiu” dyshohen të kenë vendosur lëndë plasëse në shkallët e një lokali në pronësi të shtetasit L.D.
Vazhdojnë hetimet për kapjen e personave të tjerë të përfshirë në veprimtari kriminale.
