Dalin detaje të reja mbi ngjarjen e rëndë të ndodhur mbrëmjen e së mërkurës, ku një pacient i prekur nga Covid, humbi jetën pasi u hodh nga kati i katërt i spitalit “Shefqet Ndroqi”.
Sikurse bëjnë me dije burime për abc news, që citojnë mbesën e viktimës Hasan Miri, 65-vjeçari nga Klosi edhe më herët ka vuajtur nga depresioni dhe është kuruar. Ajo ka thënë se gjendja e tij psikologjike ishte rënduar pasi mësoi se ishte prekur nga koronavirusi.
Bëhet me dije se janë marrë në pyetje disa familjarë dhe mjekë, që kanë ndjekur rastin e 65-vjecarit nga Klosi, Hasan Miri.
Të njëjtat burime thonë se disa nga mjekët, kanë deklaruar pranë grupit hetimor se Miri, ka shfaqur ditën e sotme, sjellje jo të qëndrueshme dhe të rënduar psikologjike. Nga deklarimet e para të mjekëve të turnit, dhe atyre që kanë ndjekur rastin e 65-vjeçarit, mësohet se në momentin kur ai ka kryer aktin ekstrem, ka qenë i vetëm në dhomën ku ishte shtruar, dhomë e cila kishte vetëm dritare.
Mësohet se pas konfirmimit me Covid-19, mjekët i kanë rekomanduar 65-vjeçarit të qëndrojë i izoluar në shtëpi, por ditën e djeshme gjendja e tij shëndetësore është përkeqësuar duke e detyruar për trajtim spitalor.
Ndërkohë u mësua se viktima ishte vjehrri i deputetit Gjetan Gjetani, i cili në një prononcim për abc news, tha se vjehrri i tij kishte shfaqur ditën e sotme gjendje të rënduar psikologjike. Ai pohoi se do të flasë në një tjetër moment për ngjarjen tragjike./Opinion.al
