Autoritetet federale po hetojnë nëse personi i armatosur që vrau tetë persona, përfshirë edhe fëmijë në një qendër tregtare në Dallas, ka lidhje me të djathtën ekstreme.
Sulmuesi, i cili u qëllua për vdekje në vendngjarje nga një oficer policie, quhet Mauricio Garcia, 33 vjeç.
Hetuesit po shqyrtojnë mediat sociale për të kuptuar ideologjinë e tij, raporton partneri amerikan i BBC-së, CBS news.
Gjatë sulmit ai mbante të veshur një bluzë me shkrimin “Right Wing death squad”.
Kjo është një frazë e njohur në mesin e ekstremistëve të krahut të djathtë dhe grupeve të supremacisë së bardhë.
Autoritetet po hetojnë nëse ai ishte i motivuar nga këto ideale dhe nëse ai kishte lidhje me njerëz me mendësi të njëjtë, tha një burim i zbatimit të ligjit për CBS.
Personi i armatosur përdori një pushkë të stilit AR-15 dhe kishte veshur pajisje luftarake gjatë të shtënave.
Dëshmitarët përshkruan skena paniku dhe tmerri kur personi i armatosur doli nga makina e tij në një parking në një qendër tregtare dhe filloi të qëllonte mbi blerësit.
Gjashtë persona u shpallën të vdekur në vendngjarje në periferi të Dallasit verior, ndërsa dy vdiqën më vonë në spital.
Të paktën tre persona të plagosur janë në gjendje kritike.
Presidenti Joe Biden e përshkroi tërbimin si “aktin e fundit të dhunës me armë për të shkatërruar kombin amerikan”. Ai konfirmoi se mes të vrarëve kishte edhe fëmijë, duke thënë se “shumë familje kanë karrige bosh në tavolinat e tyre të darkës”.
