Rrjetet sociale por dhe shumë media kritikuan ministren Elisa Spiropali për publikimin e një takimi me familjarët e vajzës së përdhunuar në Kavajë. Por këtë të premte, zonja Spiropali tha se ishin vetë familjarët që kërkonin të jepnin një mesazh publik.
“Po vajzën e kam takuar, por nuk dua të flas për këtë gjë. Ajo ishte e pa rrëzuar dhe shumë inteligjente dhe kam bindjen që ajo vajzë do bëhet dikush. Unë e kam ndjekur nga fillimi në fund dhe jam në kontakt të vazhdueshëm me ta. Patjetër ishte me vullnetin e tyre dhe ata donin të dilnin në të gjitha kamerat për të folur për politikën. U trajtua aq paturpësish nëpër studion televizive dhe këtu biem të gjithë dakord. U përmendën edhe detaje të rastit që asnjëherë nuk duhej të ishin publikuar. Gjyshi më erdhi në zyrën time dhe më kërkoi që të ndalej kjo mizori dhe të bënte një apel. Unë në fakt fola në emër të tij në reagimin e dytë. Ata kërkonin të jepnin një mesazh publik”.
Por përpara se zonja Spiropali të publikonte atë video, Policia e Shtetit me anë të një deklarate theksonte se familja e vajzës kishte pranuar denoncimin me kushtin që ngjarja të mos bëhej publike.
