ERALD DELIU/ Kur është mbushur një vit nga ngjarja në tregun ushqimor të Elbasanit, ku u përplas nga një mjet i blinduar automjeti i ish-drejtorit të Policisë atje, Gjergji Oshafi, ngjarja jo vetëm që nuk është zbardhur ende plotësisht, por vazhdon të përcillet sa në Elbasan dhe sa në Tiranë.
“Panorama” mëson nga burime konfidenciale në Prokurorinë e Krimeve të Rënda se dosja në fjalë do të hetohet sërish nga Krimet e Rënda, vetëm pak kohë pasi u ridërgua në Prokurorinë e Elbasanit. Ka qenë kjo e fundit që ka kryer edhe një herë tjetër rikualifikim të veprave penale, për të cilat po hetohen mbi gjashtë persona dhe ku vetëm katër janë nën masa sigurimi. Kështu, të hetuarit akuzohen për vrasje të punonjësit të Policisë, të mbetur në tentativë, mes të tjerash po hetohet edhe për grup të strukturuar kriminal. Kjo është hera e tretë që dosja në fjalë vjen te Krimet e Rënda.
Kujtojmë se më 19 shtator 2017, Prokuroria e Elbasanit nisi hetimet për dosjen në fjalë dhe pasi administroi edhe pamjet filmike në tregun ushqimor, e kaloi dosjen te Krimet e Rënda. Në fund të vitit 2017, Prokuroria e Krimeve të Rënda vendosi të shpallë moskompetencë, duke e kaluar dosjen në Prokurorinë e Elbasanit, ndërsa kjo e fundit, me fillimin e vitit të ri e ridërgoi edhe një herë te Krimet e Rënda. Vetëm një muaj më parë dosja kaloi në Elbasan sërish për t’u rikthyer ditët e fundit te Krimet e Rënda për të tretën herë. Kjo dosje është hetuar nga Krimet e Rënda prej prokurorit Behar Dibra.
PËRPLASJA
Gjithçka nisi më 18 shtator 2017 rreth orës 20:00 në lagjen “Syrja Dylgjeri” të Elbasanit para tregut agroushqimor. Efektivët e Policisë, së bashku me ish-zv/drejtorin Gjergji Oshafi, kishin ndaluar mjetin tip “Range Rover”, në të cilin po udhëtonin Klement Xhaferri dhe Ledio Zabeli. Efektivët kishin parë një radio të dyshimtë në automjet dhe ndaluan dy personat e dyshuar, të cilët nuk iu bindën urdhrit të Policisë. Mjeti ishte nën pronësi të biznesmenit Petrit Çela. Në momentin që do të bëhej shoqërimi i dy personave, në vendngjarje ka ardhur një automjet tip “Audi” i blinduar, që dyshohet se drejtohej nga Suel Çela, djali i biznesmenit Petrit Çela.
Mjeti ka kaluar pranë mjetit të ish-zv/drejtorit të Policisë, Gjergji Oshafi dhe e ka përplasur këtë të fundit, duke u larguar drejt tregut agroushqimor. Gjatë këtij momenti ka pasur edhe të shtëna me armë nga ana e efektivëve drejt “Audit” të blinduar. Policët i kanë dhënë urdhër rojës së tregut, Valmir Dedës që të hapë portën e tregut, por ai u ka thënë se nuk e kishte pultin. Pas disa minutash, dera është hapur dhe policët kanë hyrë brenda në treg duke arrestuar edhe rojën e tij. Ata kanë gjetur “Audin” e blinduar, i cili rezultoi se ishte nën pronësi po të biznesmenit Petrit Çela. Fillimisht, efektivët e Policisë kanë thënë në dëshmitë e tyre se mjeti erdhi me shpejtësi drejt tyre dhe u rrezikoi jetën. Por kamerat e sigurisë, të publikuara disa ditë më pas, tregonin një panoramë tjetër.
Mjeti tip “Audi” po lëvizte ngadalë dhe atij iu pre rruga nga mjeti i ish-zv/ drejtorit të Policisë, Gjergji Oshafi. Si drejtues i mjetit tip “Audi” u arrestua fillimisht shtetasi Enea Bekteshi, i cili tha para Prokurorisë se ishte nën efektin e lëndëve narkotike kur ndodhi ngjarja dhe se u tremb nga të shtënat e efektivëve të Policisë. Ai tregoi se donte vetëm të hynte në treg dhe nuk kishte si qëllim të godiste Policinë. Madje, ai hodhi edhe akuza ndaj bluve, duke pretenduar se mund të kishte vdekur nga të shtënat e tyre, në rast se mjeti nuk do të ishte i blinduar. Mirëpo, nga hetimet më të hollësishme, Prokuroria dyshon se Bekteshi ka kryer kallëzim të rremë, pasi mjeti ka qenë nën drejtimin e Suel Çelës.
Për rastin në fjalë, ish-ministri Xhafaj shkriu të gjithë Drejtorinë e Policisë së Elbasanit, duke larguar edhe Gjergji Oshafin dhe vendosur në krye të saj Altin Qaton./PANORAMA
