TIRANË- Personi me precendentë penale për plagosje, kanosje, armë pa leje e drogë, Klajdi Gjeci, është rrahur dhe mbajtur peng përreth dy orë nga persona tashmë të identifikuar.
Ngjarja ndodhi mbrëmë rreth orës 22:00 në unazë ne vendin e njohur si farmacia 10. Klajdi Gjeci udhëtonte me një BMW X6 me targa AA 588 FP, automjet ky në pronësi të shokut të tij Dorian Koçi. Ai u ndalua nga një automjet tjetër dhe tre personat që udhëtonin në të e kanë rrahur e më pas rrëmbyer Klajdi Gjecin.
Në fillim u dyshua për një konflikt të çastit për gërvishtje makinash, por më pas policia arriti të zbardhë ngjarjen dhe të prangosë autorët.
Pak para mesnate u njoftua se në një taksi, jo shumë larg vendit të ngjarjes u kapën pengmarrësi dhe pengu.
Policia tha pengmarrësi është një pronar lokali në zonën e Freskut në Dajt, me emrin Kleidi Yzeiri, 27 vjeç. Opinion.al arriti të sjellë në kohë reale momentin e arrestimit të tij (shih foton).
Ndërsa mëngjesin e sotëm u kap bashkëpunëtori i tij Martin Seferi 31 vjeç. Sakaq është shpallur në kërkim autori i tretë, E.Y.
Por cilat janë motivet e ngjarjes?
Nga marrja në pyetje e autorëve dhe pengut është mësuar se Klajdi Gjeci ka drekuar në lokalin e Kleidi Yzeirit mesditën e djeshme. Pas një zënke për shkaqe banale ai ka rrahur kamerierin e këtij lokali. Më pas pronari, Kleidi Yzeiri sëbashku me dy të tjerë janë vënë në ndjekje të Klajdi Gjecit. Ata e kanë kapur pranë farmacisë nr.10 në Tiranë.
Pas një debati në rrugë, ata e kanë rrahur Gjecin dhe më pas e kanë futur në makinë. Dyshohet se edhe gjatë mbajtjes peng, Gjeci është rrahur sërish prej Yzeirit dhe dy të tjerëve.
Kleidi Yzeiri po mbahet në polici prej mesnatës, ndërsa Klajdi Gjeci pasi është marrë në pyetje është lënë i lirë.
Edhe pse ngjarja pothuajse është zbardhur, hetimet vazhdojnë për plotësimin e dosjes, faktimin e provave dhe ngritjen e akuzave për personat e përfshirë në këtë ngjarje. /opinion.al/
