Presidenti i Republikës Bujar Nishani ka dalë në një konferencë për mediat ku ka folur për një çështje që sipas tij e ka vënë institucionin e presidencës në një situatë kontradiktore.
Duke pohuar se ndryshimet kushtetuese për reformën në drejtësi hyjnë në fuqi në 11 gusht, Nishani foli për një institucion që krijohet nga këto ndryshime: Këshillin e Emërimeve në Drejtësi.
Ky ent, anëtarët e të cilit zgjidhen përmes shortit, do të merret me vlerësimin e kandidaturave për Gjykatën Kushtetuese dhe Inspektoriatin e lartë të Drejtësisë.
Neni përkatës i kushtetutës përcakton që brenda pesë ditësh nga ndryshimet kushtetuese presidenti duhet të zgjedhë anëtarët e Këshillit të Emërimeve.
Kushtetuta në anë tjetër në pikën 5 përcakton kriteret e tjera për shkallën e kualifikimit të kandidatëve që marrin pjesë në short. Kjo sipas Kushtetutës, bëhet bazuar në ligj.
Por, Kuvendi i Shqipërisë nuk ka miratuar ende ligjin që përcakton kriteret e kualifikimit.
Pra presidenti ndodhet në një situatë kur nga njëra anë duhet të hedhë shortin për anëtarët dhe po kushtetuta në anë tjetër pikën 5 të saj i kërkon që kriteret e atyre që kandidojnë përcaktohen me ligj, ndërkohë që nuk kemi një ligj.
Kjo e vë presidentin në një situatë kontradiktore, por presidenti shprehu angazhimin “që të realizojmë zgjidhjen më të mirë të asaj cfarë kërkon Kushtetuta”.
Presidenti pohoi se ka ftuar në një takim të martën në orën 11 grupet parlamentare për të ndarë mendimet mbi problematikën.
Para takimit zyrtar, Nishani, do të realizojë një takim konsultativ me ekspertë konstitucionalistë për të marrë pikëpamjet e tyre.
Opinion.al/ a.h
