Deputeti i Partisë Demokratike Oerd Bylykbashi i është përgjigjur publikisht ftesës së nënkryetares së Kuvendit, Vasilika Hysi për të bashkuar votat për ligjin e magjistraturës dhe atë të kodit rrugor.
Ai e konsideron katastrofë atë çka është shkakruar në drejtësi, ndërsa shkruan se janë injoruar paralajmërimet e opozitës.
Ashtu si LSI dje, edhe PD refuzon të votojë ligjet në fjalë.
Reagimi i Bylykbashit
Më 21 korrik, para dy viteve, ne t’i patëm thënë e stërthënë këto konkluzione për reformën në drejtësi, gjatë mbledhjeve të komisionit. Ty, Vasilikë t’u deshën dy vite që bashkë me Ulsiun, t’i kuptonit këto. Ti dhe kolegët e tu, duhet të merrni përgjegjësinë për rrëmujën katastrofale në drejtësi, që keni shkaktuar me mendjelehtësinë tuaj dhe duke injoruar paralajmërimet e opozitës.
Vasilikë, nuk mund t’i kërkosh opozitës të jetë e përgjegjshme e të votojë që të kompletojë sistemin e kapjes politike të drejtësisë prej jush, e të bëhet palë. Meqë nuk ju funksionoi mekanizmi i kapjes afatgjatë tek Magjistratura, kërkoni që t’ju ndihmojë opozita?! A je e përgjegjshme për këtë kërkesë Vasilikë?!
