Shumë nga mediat ndërkombëtare kanë pasqyruar koncertin e Rita Orës në Prishtinë me rastin e 10-vjetorit të Pavarësisë së Kosovës. Por mes lajmeve që sillnin detaje nga ky koncert, ai i tabloidit britanik “Daily Mail”, ka rënë në sy për një gabim, jo të vogël. “Rita Ora feston 10-vjetorin e Pavarësisë së Ukrainës”, thuhej në titullin e artikullit, që më pas nënvizon takimin që Rita Ora pati me Kryeministrin e Kosovës Ramush Haradinaj ditën e djeshme.
Gafa e “Daily Mail”, me emrin e Kosovës nuk ka kaluar pa u vënë rem ndërkohë që ky tabloid i ka dedikuar edhe artikuj të tjerë koncertit madhështor që u mbajt mbrëmë në Prishtinë, me të ftuar speciale këngëtaren shqiptare.
“Ajo u kthye në vendin e saj të origjinës në Kosovë për të shënuar 10-vjetorin e Pavarësisë nga Serbia. Rita Ora nuk i zhgënjeu fansat e saj kosovarë kur mbajti një koncert të mrekullueshëm në Prishtinë”, shkruan “Daily Mail”.
Mëngjesin e sotëm, vetë Rita ka publikuar një status falënderimi dhe disa foto, në instagramin e saj.
