Nxënësit nga klasa e parë deri në të 12-tën në Republikën e Shqipërisë do të rikthehen ditën e sotme në shkolla me turne normale dhe orët e plota, 45 minuta.
Rreth 480 mijë nxënës rikthehen normalitetit, pas më shumë se një viti me mësim të alternuar dhe me turne dhe orë të shurtuara. Një vendim i tillë ka ardhur që prej marsit të vitit 2020, kur në vendin tonë u konfirmuan rastet e para me koronavirus.
Viti i ri shkollor nisi me mësim me turne dhe orë të shkurtuara, por këmbëngulja e prindërve, që firmosën një peticion drejtuar ministres së Arsimit, bëri që Komiteti Teknik i Ekspertëve të tërhiqej dhe të lejonte mësimin me orë normale.
Ndërkohë që në një reagim për mediat ministrja e Arsimit Evis Kush kishte një porosi për të gjithë nxënësit.
“Përgjegjësia jonë e përbashkët është edhe më e madhe për të zbatuar masat e nevojshme që mbrojnë shëndetin e të gjithëve: vazhdimi i procesit të vaksinimit; mbajtja e maskave; dezinfektimi i mjediseve; ruajtja e higjienës – në mënyrë që mos të jemi të detyruar t’i rikthehemi më skenarit të mësimit me turne” tha ministrja Kushi./Opinion.al
