Nëpërmjet një postimi në rrjetet sociale, kryetari i PD, Sali Berisha ka bërë të ditur se duke filluar nga sot, me ndjekësit do të komunikoj dhe nëpërmjet podcastit.
Berisha thotë se ka të regjistruar podcastin e tij që Dhjetorin e vitit të kaluar dhe se për këtë format është shtyrë nga takimet që ka zhvilluar me qytetarët.
Në postimin e tij, kryedemokrati Berisha i ka ribërë edhe njëherë ftesë kundërshtarit të tij politik, Edi Ramës për debat në podcastin e tij.
Kjo vjen pasi Kryeministri Rama, ditën e sotme ka bërë të ditur se shumë shpejt do të vijë me podcastin e tij ku të ftuar do të jenë personazhe të fushave të ndryshme e pse jo edhe kundërshtarët e tij politikë.
“Të dashur miq të komunitetit të madh të rrjeteve sociale Facebook, Instagram dhe Tik Tok. Që prej Dhjetorit, kam në ‘sirtarin’ tim dixhital të komunikimit me ju, edhe podcast-in tim të përjavshëm. Ngjarjet e kanë shtyrë këtë takim të ri me ju në një format tjetër, por duke filluar nga sot do të shihemi edhe në këtë dritare të re.
Mora vesh se edhe Edi Rama do ketë podcast. Si gjithmonë disa hapa pas meje, por ju e dini se unë kam një pasion të veçantë për teknologjinë dhe risitë e saj.
Kam menduar që komunikimi me ju në podcast të përqendrohet kryesisht në çështje jo politike, në Sali Berishën qe ju nuk e keni njohur dhe këtë e provon edhe ky episod i parë, i regjistruar në Dhjetorin e kaluar.
Meqë Rama paska thënë se është gati që të debatojë edhe me kundërshtarin politik, një ftesë që unë ja kam bërë prej kohësh në studiot televizive, ia përsëris tani publikisht, që ta bëjmë debatin të cilit ai i shmanget. Ku të dojë ai, në podcast-in tim apo të tijin.
Mendoj se politikanët duhet të ballafaqojnë pikëpamjet e tyre. Uroj të gjejë kurajo dhe të pranojë ftesën time”, shkruan Berisha në Facebook.
