Pas lejes së dhënë nga Prokuroria e Posaçme, ish-zëvendësministri i Shëndetësisë, Klodian Rrjepaj, ka mbërritur me pranga në duar këtë të premte, i shoqëruar nga forcat e policisë, në Kuvend, aty ku po mbahet komisioni Hetimor i Shëndetësisë, i cili do të shqyrtojë koncesionin e sterilizimit.
Ky është rasti i parë kur deputetët marrin në pyetje një të paraburgosur. Përveç ish-zëvedësministrit do të merren në pyetje edhe dy prej anëtarëve të komisionit që shpalli fituesin e koncesionit, Marsela Serjani dhe Petro Mersini.
Në fjalën e tij, Rrjepaj është shprehur se, “të thuash po hetojmë projektin e sterilizimit nuk është e drejtë. Është në kurriz të gjithë aktiviteteve të tjera që kryhen brenda këtij projekti”.
“Të thuash po hetojmë projektin e sterilizimit nuk është e drejtë. Është në kurriz të gjithë aktiviteteve të tjera që kryhen brenda këtij projekti.
Sterilizimi është një shkurtim gjuhësor që nuk ka ardhur si rastësi. Ka qenë një tjetërsim, dhe ndoshta nuk ka qenë rastësi që debati dhe analiza me konkluzionet kanë ardhur si devijim i përkufizimit të këtij projekti.
Do të ishte mire që kur themi sterilizimi të kuptojmë një projekt që ka objektin e vet, ofrimin e setit të instrumenteve, ofrimin e veshjeve një-përdorimshe për personelin mjekësor, dezinfektimin e sallave, trajtimin e mbetjeve me risk biologjik si dhe administrimin e repartit qendror të sterilizimit. Këto elementë përmbajnë projektin që nuk është vetëm sterilizimi”, tha Rrjepaj.
Ndërkohë, më 3 tetor, do të dëshmojë edhe ish-ministri i Shëndetësisë, Ilir Beqaj, i cili është nën hetim nga SPAK për sterilizimin, por aktualisht është në burg për një tjetër dosje, për abuzimin me fondet e BE-së.
