Është zbardhur një pjesë e dosjes hetimore të Dan Hutrës, i cili më datë 1 mars ekzekutuoi tre gra si dhe plagosi tre të tjera në Tiranë.
Në dëshminë e dhënë në organin e akuzës, sipas Euronews, ai rrëfen njohjen në maj të vitit 2022 me Elena Hysën. Më pas lidhja mes të dyve shkoi drejt celebrimit, ku pas njohjeve familjare u mbajt dhe dasma në 2 qershor të vitit të shkuar.
Ndër të tjera ai rrëfen edhe për shtatzaninë e Elenës si dhe si nisën konfliktet mes tyre.
“Pas vizitave te mjeku mësuam se Elena ishte 45 ditëshe shtatzënë”, deklaron Hutra në dosjen hetimore.
“Konfliktet mes nesh nisën më 19 qershor të vitit 2022, rreth dy javë pas dasmës, kur e lashë Elenën në banesë, por kur u ktheva nuk e gjeta më aty”, vijon në dëshminë e tij Hutra.
Më pas ai thotë se shkoi te banesa e familjes së gruas, por bashkëshortja nuk ndodhej përsëri as aty.
“Së bashku me nënën dhe vjehrrën shkuam në Komisariatin numër 5 në Tiranë, ku bëra një denoncim për humbjen e kontakteve me gruan”, vijon në deklarimet e tij Hutra.
Elena u bë e gjallë pas disa orësh, çka bëri që të lindte një debat i ashpër mes nesh, vijon ai.
Në dosje theksohet se në këtë moment Dan Hutra pohon se u ka kthyer unazën e martesës familjes Hysa. Por pas 1 javë ata e kanë kontaktuar në lidhje me shtatzëninë e ish-gruas dhe aty është arrestuar padrejtësisht në shtëpinë e vjehrrit.
Hutra sqaron se vrasjet i planifikoi gjatë kohës që ishte në burg dhe se po mbahej aty padrejtësisht.
