Lefter Koka, ish-ministër i Mjedisit, u arrestua sot nga SPAK, duke u bërë kështu dhe zyrtari i parë i lartë i këtij niveli që vihet në pranga në Shqipëri.
Por kush është Lefter Koka? Lefter Koka u përfshi në politikë në vitin 2000 si anëtar i Këshillit Bashkiak të Durrësit, pas angazhimit në sektorin privat. Në vitet 2003-2007, Lefter Koka ka shërbyer si kryetar i Bashkisë së Durrësit, ndërsa prej vitit 2009 ka qenë deputet i Kuvendit të Shqipërisë nën siglën e Lëvizjes Socialiste për Integrim.
Ai u zgjodh ministër i Mjedisit në kabinetin e kryeministrit Edi Rama pas zgjedhjeve parlamentare të vitit 2013, si pjesë e Lëvizjes Socialiste për Integrim dhe u largua nga funksioni pas prishjes së koalicionit PS-LSI.
Më pas Koka u shkëput nga kjo parti në kohën kur LSI dhe PD dorëzoi mandatet e deputetëve dhe u largua nga parlamenti duke iu bashkuar Partisë Socialiste. Ai ishte pjesë e listave të kandidatëve për deputetë të Partisë Socialiste në zgjedhjet e 25 prillit.
Por më 1 shtator, deputeti i zgjedhur i PS-së, Lefter Koka, njoftoi dorëheqjen nga mandati i deputetit të fituar në 25 prill në Durrës.
Ish-ministri sot akuzohet si i përfshirë në aferën e inceneratorëve. Ndaj tij rëndojnë akuzat për shpërdorim detyre, dhe korrupsion./Opinion.al
