Ka ndryshuar gjithçka në Komisionin e Këshillit të Mandateve, ish-ministri i Brendshëm Saimir Tahiri ka adresuar disa pyetje ndaj prokurorëve të Krimeve të Rënda, në vend që të ndodhte e kundërta.
Tahiri u është drejtuar prokurorëve të pranishëm në komision, duke i pyetur: Se nga koha kur unë kam qenë ministër nuk është referuar asnjë material në Prokurori, duke kërkuar një saktësim nga ata.
Prokuroria: Jo nuk është referuar!
Saimir Tahiri: A jeni në dijeni që unë në mes të shtatorit jam paraqitur pas disa deklaratave tek Prokurori i Përjgithshëm dhe më pas ju keni regjistruar procedimin penal për këtë çështje dhe është mbyllur?
Prokuroria: Ju jeni përfshirë në një skandal politik dhe keni ardhur për të sqaruar pozitën tuaj.
Saimir Tahiri: Më thoni, keni dijeni apo jo?
Këshilli i Mandateve dhe Rregulloreve është mbledhur këtë paradite për kërkesën e Prokurorisë së Krimeve të Rënda për heqjen e imunitetit të Saimir Tahirit dhe dhënien e autorizimit për arrestimin e tij.
Vetë ish-ministri i Brendshëm është i pranishëm në këtë mbledhje, por do të jetë avokati i tij Artan Hadaraj që do të flasë për të. Ndërsa organi i akuzës është përfaqësuar nga kreu i Prokurorisë së Krimeve të Rënda, Besnik Hajdarmataj.
Ai kërkoi që mbledhja të zhvillohej me dyer të mbyllura, për shkak të sekretit hetimor, por kjo kërkesë nuk u pranua nga Këshilli dhe mbledhja vijoi me dyer të hapura.
Teksa Hajdarmataj argumentoi kërkesën e tij se bëhet fjalë për heqjen e imunitetit të deputetit, teksa një pjesë të dokumenteve nuk pranoi t’i bëjë publike për median.
