Në një konferencë për mediat, kreu i PD Sali Berisha u kërkoi mediave që të zëvendësojnë fjalën zgjedhje me fjalën farsë.
Berisha u shpreh se ajo që ka ndodhur më 11 maj dhe të gjithë periudhën pararendëse është një përmbysje e plotë e parimeve më themelore të zgjedhjeve të lira. Sipas tij kontrolli i vullnetit të zgjedhësve ishte i gjithëformshëm nga miklimet, influenca deri të kërcënimet e revolja në ballë.
“Kërkoj mirëkuptimin e mediave të heqin nga fjalori i tyre fjalën zgjedhje dhe ta zëvendësoni me fjalën farsë zgjedhore sepse në këto zgjedhje u shkelen parimet me themelore të zgjedhjeve të drejta, për të cilat Shqipëria ka firmosur dokumentin e Kopenhagenit. Ajo që ka ndodhur më 11 maj dhe të gjithë periudhën pararendëse për zgjedhjet e 11 majit është një përmbysje e plotë e parimeve më themelore të zgjedhjeve të lira, të cilat kërkojnë që zgjedhësit të shprehin mendimin e tyre lirshëm për përfaqësuesit e tyre të zgjedhur. Kontrolli i vullnetit të zgjedhësve ishte i gjithëformshëm nga miklimet, nga influenca deri të kërcënimet e revolja në ballë”, tha Berisha.
Kreu i PD tha se janë shkelur parimet themelore, në mënyrën si janë zgjedhur kandidatët për deputet në radhët e socialistëve.
“Të pyes çdo qytetar: si u zgjodh Blendi Gonxhja, Sara Mile, si u zgjodhën lista e kandidatëve që mbështeten nga banditët në parlament. Pra, kemi të bëjmë me sharrimin e këtij parimi themelor që zgjedhjet i dëshmon farsë. Që Shqipëria pati farsë elektorale, të cilën njerëzit e lirë kurrë nuk mund ta pranojnë. Në këto zgjedhje dhe në këtë vend u shkel një parim tjetër ndër më themelorët i një sistemi demokratik. Parimi kusht që ndan shtetin ligjor nga shteti partiak. Dhe kjo ndodhi në mijëra e mijëra raste”, pohoi Berisha.
