Drejtuesit e Real Sociedad kanë konfirmuar: “Adnan Januzaj do të qëndrojë jashtë fushës për një periudhë të papërcaktuar”. Futbollisit 22-vjeçar me kombësi shqiptare, që zgjodhi të përfaqësojë Belgjikën, shpresonte të rimëkëmbte karrierën e tij, pasi u transferua gjatë merkatos së verës nga Manchester United, drejt ekipit spanjoll për një shumë prej £8milionë. Por tashmë, pas vetëm katër ndeshjes me ekipin e La Liga, Januzaj përballet me rrezikun e të qëndruarit jashtë për një periudhë të gjatë kohe.
Klubi i Real Sociedad konfirmoi se futbollisti kishte ndjerë dhimbje të tmerrshme në gjurin e tij pas humbjes 3-1 përballë Zenit St. Petersburg në Europa League dhe skaneri ka dëshmuar se mund të ketë një problem serioz. Një njoftim zyrtar citonte: “Adnan Januzaj ka zhvilluar ndeshjen ndaj Zenit St. Peterbursburg pa u ankuar, apo shfaqur trauma të dukshme, por një orë më vonë ai nisi të ndjejë dhimbje të forta në gjurin e tij të djathtë. Skaneri të cilit iu nënshtrua dje dëshmoi një fusion artikular të theksuar, që mund të ketë lidhje me operacionin e mëparshëm të meniskut. Plani fillestar është që futbollisti të pushojë dhe ti nënshtrohet fizioterapisë. Rikthimi i tij në aktivitet do të jetë progresiv, dhe do të varet nga përmirësimi i rekuperimit”.
