E ardhmja e Zlatan Ibrahimovic nuk dihet akoma. Dhe deri në momentin që nuk do të jetë përcaktuar, do të jetë e vështirë të kuptohet saktësisht pamja që do të ketë Manchester United për sezonin e ri. “Djajtë e Kuq” janë mbrojtur duke blerë Romelu Lukaku, një lëvizje me një vlerë mbi 100 milionë euro (karton+rrogë). Por Ibrahimovic po rikuperon shumë shpejt nga dëmtimi në gju, i pësuar në Europa League, dhe rinovimi i tij në “Old Trafford”, që në fillim dukej i pamundur, sot jepet si diçka që mund të realizohet. Me ose pa suedezin, loja sulmuese e Manchester United ndryshon rrënjësisht.
ME IBRËN – Në videon e mësipërme janë përzgjedhur disa lëvizje domethënëse të Ibrahimovic në një sfidë kundër Manchester City, në mënyrë që të mund të krahasohen me ato të Lukaku-t në miqësoren e luajtur pikërisht kundër Guardiola-s. Nuk ka rëndësi rezultati, por stili i lojës. Me Ibrën në fushë, sulmuesi i United fiton teknikë dhe krijohen më shumë hapësira për depërtimin e shokëve të skuadrës. Efikasiteti në shpërthim ka rënë pak me kalimin e vitit, ashtu si vrapimi me topin në këmbë. Zlatan, siç është normale të ndodhë në fundin e karrierës së një lojtari, i ka rralluar lëvizjet në fushën e lojës.
ME LUKAKUN — Lukaku, nga ana tjetër,është 24 vjeç dhe është në kulmin e pjekurisë së tij fizike. Nuk ka këmbë shumë të rafinuara kur duhet të kombinojë me shokët e ekipit, por siç mund të shihet në videon e mësipërme, dëshira e belgut për t’u kthyer në mesfushë dhe për të vënë kokën në shërbim të shokëve është e dukshme. Më pas është i aftë në shfrytëzimin e hapësirave: goli ndaj City është një tregues i qartë për këtë. Në krahasim me Ibrën, më pak prekje të topit dhe më shumë lëvizje.
ME RASHFORD — Në fund, duke parë se Rooney është kthyer tek Everton, mbetet opsioni “Rashford plus Marital”. Mund të përdoret kur United do të duhet të vrapojë shumë dhe të çajë mbrojtjet e përbëra nga lojtarë shtatlartë. Në raste të tilla, deri tani, ka qenë Rashford ai që është përzgjedhur nga Mourinho si sulmues i parë, em Martial që është pozicionuar në krah. Goli i realizuar ndaj Real Madrid ka lindur në këtë mënyrë, nga një magji e francezit në krahun e majtë të sulmit. Është e qartë se, me këtë opsion, Mou humb peshë dhe fuqi. Por është një armë taktike që mund të përdoret në situata specifike. Nuk duhet nënvlerësuar.
