Kreu i PD-së, Lulzim Basha e ka thënë qartë se, opozita do të pamundësojë zgjedhjet e 30 Qershorit nëse ato nuk do jenë të lira e të ndershme.
Por teksa të martën skadon zyrtarisht afati që i lë në dispozicion kodi zgjedhor partive politike për t’u regjistruar për pjesëmarrje në zgjedhjet e 30 qershorit, deri më tani 43 është numri i subjekteve zgjedhore që duan të jenë pjesë e garës elektorale.
Nga këto forca politike 35 janë regjistruar në KQZ, ndërsa 8 të tjera kanë aplikuar për t’u regjistruar.
PS dhe 18 parti të tjera aleate te socialisteve, si PSD e Skënder Gjinushit apo PS e Moderuar e Gjergj Kojës kanë dorëzuar dokumentet në institucionin qendror të zgjedhjeve.
Në kampin e djathtë është 5 numri i partive që janë regjistruar për garën vendore. Dikur aleatë të Bashës, Bashkimi Demokrat Shqiptar me kryetar Ylber Valteri, Partia Ora e Shqipërisë e drejtuar nga Zef Shtjefni, Bashkimi Liberal Demokrat e drejtuar nga Arian Starova, Partia për Liri, Demokraci dhe Etikë e Arian Galdinit, si dhe Partia Kombëtare Konservatore e drejtuar nga Kujtim Gjuzi janë regjistruar për zgjedhjet vendore.
Po ashtu pritet dhe vendimin që do të marrë Rudina Hajdari, pas krijimit të partisë së re “Bindja Demokratike”./Opinion.al
