Rekuizita e filmave shqiptarë nga “Alba Film” përmbledh të gjitha sendet e përdorura në ta, që nga detajet më të vogla e deri te makinat. Por jo vetëm kaq, kjo rekuizitë ruan edhe një pjesë të historisë të lidhur me ish-diktatorin Enver Hoxha. Administratorja e “Alba Film”, Aurora Polo, shprehet se të gjitha sendet, dhuratat, makina, djepi apo banka e tij e shkollës ruhen në këtë rekuizitë.
Aurora Polo: Dua të theksoj që në rekuizitën e “Alba Filmit” ndodhen dhe të gjithë sendet e zyrës së ish-diktatorit dhe ato ruhen me shumë kujdes.
Rudina Magjistari: Po pse ruhen në arkivën e “Alba Filmit?”
Aurora Polo: Sepse kjo ka ndodhur ngaqë pas viteve ’90 iu dhanë Kinostudios të gjitha, siç thashë edhe makina që ishte përdorur nga vetë ish-diktatori iu dha Kinostudios në ruajtje ngaqë ishte vendi, si duket, më i sigurtë për të ruajtur të gjitha këto. Gjithë sendet, dhuratat që i jepeshin ish-diktatorit janë të ruajtura me kujdes.
Rudina Magjistari: Po kjo bankë?
Aurora Polo: Është banka e ish-diktatorit. Gjithashtu edhe djepi.
Rudina Magjistari: Ka pasur bankë? E mbante në shtëpi?
Aurora Polo: Bankën e shkollës ku ka studiuar në Gjirokastër, ruhen tek ish-Kinostudio. Të gjitha ishin të ruajtura aty. Ja edhe djepi i ish-diktatorit./tvklan.al
