Dita e sotme shënon dhe afatin e fundit që i është lënë kreut të PD-së, Lulzim Basha, nga Komisioni për Rithemelimin i dalë nga Kuvendi i 11 Dhjetorit, për të liruar selinë blu.
Përmes një letre që iu dërgua kryedemokratit Lulzim Basha iu kërkua që të respektojë vullnetin e anëtarësisë së demokratëve që votuan në referendumin e18 Dhjetorit për shkarkimin e tij, duke liruar zyrën.
Ndërkohë sot situata në selinë e PD-së paraqitet e qetë. Ajo që është vënë re është se dera kryesore e selisë blu është mbyllur ndërkohë që deputetët kanë hyrë në dyert anësore.
Ka qenë deputetja e Partisë Demokratike, Jorida Tabaku ajo që e gjeti ditën e sotme derën kryesore të selisë blu të mbyllur. Sikurse duket në foto ajo ndodhet jashtë selisë së PD-së duke pritur, ndërsa më pas ka hyrë nga dyert anësore.
Sakaq, Gazeta “Panorama” raporton se dera kryesore e selisë blu ishte e aksesueshme vetëm për kryetarin e Partisë Demokratike, Lulzim Basha. Kreu i PD-së mbërriti dje në selinë blu pas mesdite, dhe pasi pa ndryshimet e reja në godinën që ende po punohet, u fut brenda përmes hyrjes kryesore. Këtë mundësi nuk e patën deputetët dhe punonjësit e administratës së PD-së që erdhën dje në selinë blu. I pari nga deputetët ishte sekretari i ri organizativ, Flamur Hoxha. Ai tentoi të hynte nga dera qendrore, por sensori që bën hapjen e saj ishte çaktivizuar.
Po kështu, edhe numri dy i Partisë Demokratike, Gazment Bardhi, pasi zbriti nga automjeti që i është vendosur në dispozicion nga partia, u ngjit në shkallët që të çojnë në derën kryesore, por më pas ai mori drejtimin djathtas për të shkuar në hyrjen anësore të godinës së PD-së. Hyrje e cila përdoret më rrallë nga të zgjedhurit në radhët e Partisë Demokratike.
Kujtojmë se PD e nisi Vitin e Ri duke bërë ndryshime në fasadën e jashtme të godinës, ku janë vendosur postera me logon e Partisë Demokratike./Opinion.al
