Kreu i PD, Sali Berisha, zhvilloi këtë të martë një takim me sipërmarrës në selinë e Partisë Demokratike.
Berisha akuzoi politikat e qeverisë Rama si dhe ndryshimet në ligjet fisake për përgjysmimin e bizneseve.
Kryedemokrati tha se kryeministri Rama është një armik i vërtetë i biznesit.
“Ndjehem shumë i nderuar me praninë tuaj dhe shpreh vlerësimin tim më të madh për kontributin që ju jepni në zhvillimin ekonomik dhe teknologjik të këtij vendi. Ne mblidhemi sot në një moment pa ekzagjerim katastrofal për këtë vend dhe në këtë katastrofë askush nuk ka paguar një çmim më të lartë se biznesi. Bizneset në këto vite janë përgjysmuar, nga 210 mijë biznese numërohen 107 mijë. Ndaj bizneseve të vendit dhe të huaja u zbatuan praktika trysnie, gjobash, zhvatjesh, të pashembullta. Në këto vite 2013-2021 ligjet fiskale u ndryshuan 40-herë. Unë ju garantoj ju se po të marrësh të gjithë kontinentin nuk përbëjnë një ndryshim 40 herë të marra së bashku. Kjo është një pasiguri totale dhe falimentim për bizneset. Ju u përballët me pasojat tejet të rënda të veprimit të bizneseve të oligarkëve dhe klientelës mbi ju. Sepse ata nuk ngopen me qindra milionë që ndajnë me qeveritarët, por vërsulen si kërpudha me ndërmarrje analoge me të cilat ju e keni shumë të vështirë të konkurroni. Shto këtu Ballkanin e Hapur nga i cili po falimentojnë dhjetëra dhe qindra ferma sepse prodhimet blegtorale po zëvendësohen me prodhimet e Serbisë të cilat janë të paktën 80 herë më shumë të subvencionuara se prodhimet në Shqipëri. Edi Rama është një armik i vërtetë i biznesit dhe i suksesit tuaj, por dhe i shqiptarëve në përgjithësi”, tha Berisha.
