Benjamin Netanyahu, kryeministri i Izraelit vizitoi spitalin Soroka në Be’er Sheva, në jug të Izraelit, pas sulmit me raketa të ndërmarrë nga Irani. Ai foli për situatën e rënduar të sigurisë dhe për bashkëpunimin me Shtetet e Bashkuara, në një dalje publike për mediat.
Numri një i qeverisë së Izraelit theksoi se beson në vendimet e Presidentit Trump, duke e quajtur “lider global të jashtëzakonshëm dhe mik të madh të Izraelit”. Ai u shpreh i bindur se as Izraeli, as SHBA nuk do të lejojnë që Irani të zotërojë armë bërthamore:
“Trump e di lojën. E kemi të qartë: Irani nuk duhet dhe nuk do të ketë kurrë armë bërthamore. Ai nuk mund të pasurojë uranium. Ka qenë i gatshëm për negociata, por ata e mashtruan. Nuk mashtron dot Donald Trump.”
Në lidhje me përfshirjen ushtarake të SHBA, Netanyahu tha se ky është vendim i Presidentit Trump, por theksoi se Amerika po ndihmon në mbrojtjen ajrore të Izraelit. Netanyahu vuri në dukje kostot njerëzore dhe personale të konfliktit, duke thënë:
“I gjithë populli i Izraelit po paguan çmimin. Kemi një luftë të vështirë dhe po e përballojmë me guxim. Ka njerëz të plagosur, familje që kanë humbur të dashurit.”
Ai zbuloi edhe një detaj personal teksa u shpreh: “Për herë të dytë, djali im Avner është detyruar të anulojë martesën për shkak të kërcënimeve me raketa. Edhe e fejuara e tij po kalon të njëjtin ankth.” Netanyahu shprehu mirënjohje për bashkëshorten e tij, duke e quajtur “një heroinë të vërtetë” për durimin dhe përkrahjen e saj në këtë kohë të vështirë.
