Benjamin Netanyahu, kryeministri izraelit ka lavdëruar Presidentin amerikan Donald Trump për goditjet e fundit ndaj objekteve bërthamore të Iranit, duke e cilësuar si “liderin që do të mbetet në histori për ndalimin e regjimit më të rrezikshëm në botë”.
Kreu i qeverisë Izraelite e falënderoi publikisht SHBA-të për ndërhyrjen, duke theksuar se Amerika ka fuqinë dhe mjetet për të udhëhequr Lindjen e Mesme drejt një të ardhmeje më të sigurt dhe paqësore.
“Presidenti Trump do të mbahet mend për guximin e tij. Ai përballoi regjimin më të rrezikshëm dhe armët më të rrezikshme,” u shpreh Netanyahu.
Netanyahu në një mesazh drejtuar popullit hebre theksoi se ka qëndruar besnik premtimeve të tij. Ai kishte paralajmëruar më herët se, përmes diplomacisë ose veprimeve ushtarake, do të shkatërronte programin bërthamor të Iranit.
Ndërkohë mëngjesin e sotëm, Irani reagoi me lëshimin e njëzet raketave balistike ndaj territorit izraelit. Sulmet ndodhën rreth orës 07:30–08:00, duke goditur zona të banuara në Tel Aviv dhe qytetin Nes Tsiona. Raportet televizive flasin për dëme të konsiderueshme materiale në ndërtesa, nga ana tjetër bilanci paraprak tregon për 35 të plagosur.
