Në Izrael pritet të zhvillohen sërish zgjedhje dhe data e përcaktuar është 17 shtatori. Ligjvënësit në Izrael kanë votuar për shpërndarjen e Parlamentit, për shkak të se kryeministri Benjamin Netanyahu nuk arriti të formonte një qeveri koalicioni.
Kryeministri nuk ia doli të përfundonte një marrëveshje për një koalicion të ri me partinë e ekstremit të djathtë, pas zgjedhjeve të muajit të kaluar. Thelbi i këtij ngërçi ka të bëjë me projektligjin për rekrutimin ushtarak, që rregullonte përjashtimet për studentët ultraortodoks.
Është hera e parë që në Izrael një kandidat për kryeministër, i cili ka fituar zgjedhjet dhe ka marrë mandatin nuk arrin të krijojë koalicionin.
Pasi Netanyahu humbi afatin përfundimtar për të arritur një zgjidhje, mesnatën mes të mërkurës dhe të enjtes me orën lokale (23 me orën tonë), parlamenti ka votuar me 74 vota pro dhe 45 kundër për shpërndarjen e tij.
Kryeministri izraelit, i cili kërkonte një mandat të pestë hyri në negociata për qeveri koalicioni pasi partia e tij “Likud” fitoi vetëm 35 vende në Parlamentin (Knesset) me 120 deputetë gjatë zgjedhjeve të prillit.
Më pas ai pati përplasje me ish-ministrin e Mbrojtjes, Avigdor Lieberman, mbështetja e të cilit në këto bisedime ishte jetike, pasi nacionalisti i partisë “Yisrael Beitenu” vendosi kushte./Opinion.al/
