Kolegji i Poasçëm i Apelimit do të zhvillojë të enjten seancën e dytë gjyqësore të ankimit të Komisionerit Publik kundër ndërprerjes së Vettingut për ish-prokurorin e Përgjithshëm, Adriatik Llalla. Bëhet fjalë për kundërshtimin e vendimit të datës 16 shkurt 2018 të Komisionit të Pavarur të Kualifikimit për ndërprerjen e procesit të rivlerësimit kalimtar të Llallës, për shkak se ai dha doreheqje nga funksioni i prokurorit.
Në seancën e kaluar, të zhvilluar në 16 Maj, trupi gjykues i KPA shtyu seancën pasi vlerësoi se prokura e paraqitur nga avokati i Llallës, Sokol Hazizaj kishte mangësi. Sipas KPA, LLalla nuk shprehet qartësisht vullnetin se Hazizaj mund të përfaqësonte në këtë proces. Njëkohësisht, KPA vendosi rinjoftimin e Llallës për datën e seancës dhe procesin që po zhvillohet ndaj tij.
Por a do të vijë nesër Llalla në seancën që po zhvillohet ndaj tij?
AbcNews ka kontaktuar avokatin i cili deklaroi se ka plotësuar prokurën e posacme. “Të enjten do të paraqes prokurën. Në vijim të detyrimit që më ka dhënë Kolegji i Posaçëm i Apelimit, kam realizuar të gjitha detyrimet e kërkuara”, tha avokati në një kontakt telefonik dhe duke nënkuptuar se do të jete ai që do perfaqësoje ish-kryeprokurorin.
Përveç ankesës së Komisionerit Publik në lidhje me Vettingun, ish-kryeprokurori Llalla po hetohet nga Prokuroria për Krimet e Rënda për kryerjen e katër veprave penale.
