Ish-presidenti Donald Trump mund të ndalohet të mbajë poste publike nëse ai shpallet fajtor për keqpërdorimin e të dhënave të klasifikuara të Shtëpisë së Bardhë.
Ligji federal ndalon dikë të dënuar për keqpërdorimin e dokumenteve të mbajë poste publike në SHBA.
Ndërsa ekspertët ligjorë kanë paralajmëruar se mund të ndikojë tek zgjedhjet presidenciale të vitit 2024 nëse Donald Trump dëshiron të rikandidojë.
“Nëse Trump dënohet sipas këtij ligji federal, atij do t’i ndalohet të mbajë çdo detyrë, përfshirë zyrën e presidentit”, tha ish-prokurorja federale Neama Rahmani.
Pasuria e Trump në Mar-a-Lago në Palm Beach, Florida u bastis nga FBI të hënën, si pjesë e një hetimi nëse ai kishte marrë me vete dokumente të klasifikuara kur u largua nga zyra presidenciale.
Trump, në njoftimin e tij pas bastisjes, nuk tha në mënyrë specifike se çfarë po kërkonin agjentët federalë, ai tha vetëm se shtëpia e tij ishte nën rrethim, nga një grup i madh agjentësh të FBI-së.
Trump mund të përballet me ekspozim të rëndësishëm kriminal nëse bastisja e FBI-së përcakton se ai shkatërroi të dhënat e qeverisë, tha Rahmani, i cili është president i avokatëve të gjyqit të Bregut Perëndimor.
Ai tha se Trump ka mundësi të akuzohet sipas Kodit të SHBA-së, Titulli 18, Seksioni 2071, i cili përfshin fshehjen ose shkatërrimin e dokumenteve të qeverisë amerikane. Kodi thotë se kushdo që ‘fsheh, heq, dëmton , fshin ose shkatërron me dashje dhe në mënyrë të paligjshme, ose tenton ta bëjë këtë, ose, me qëllim për ta bërë këtë, merr dhe heq çdo procesverbal’ mund të dënohet edhe me tre vjet burg.
Po ashtu thuhet se kushdo që dënohet për fshehjen ose shkatërrimin e të dhënave do të humbasë detyrën e tij dhe do të skualifikohet nga mbajtja e ndonjë posti në Shtetet e Bashkuara.
Ish-presidenti Trump mori me vete 15 kuti materiale në janar 2021 pasi u largua nga detyra.
Kutitë u kthyen në Arkivin Kombëtar një vit më vonë, në janar 2022, por agjentët të hënën thuhet se po kërkonin të shihnin nëse Trump kishte të dhëna presidenciale shtesë ose ndonjë dokument të klasifikuar në pasurinë e tij në Florida të Jugut./Opinion.al
