Në prag të ndeshjes me Shqipërinë, situata te Serbia duket që nuk është aspak e qetë. Dragan Stojkovic, trajneri i serbëve ka marrë kritika të shumta, për lënien jashtë të disa lojtarëve me emër, si Sergej Milinkovic-Savic apo portieri Mile Svilar.
Në lidhje me këtë, ai shpërtheu në konferencë për shtyp, duke thënë se në kombëtare është trajneri ai që vendos. Sipas tij, do të ftohen vetëm lojtarët që e meritojnë, ndërsa theksoi se nuk do i lutet asnjërit.
I pyetur nëse është ai problemi, Stojkovic u shpreh se do të japë menjëherë dorëheqjen, nëse kjo është e vërtetë.
“Svilar? Unë në Romë mund të shkoj, të ha një drekë, të pi një kafe ose të shoh një ndeshje. Por, nuk shkoj t’i lutem asnjërit që të vijë te Serbia. Kjo nuk do të ndodhë kurrë. Jo Svilar të jetë, por kush të dojë.
Nëse unë jam problemi, jap menjëherë dorëheqjen pas kësaj konference. Nuk mendoj se është e vërtetë që jam unë problemi. Këta janë lojtarë që e panë se nuk kanë vend në kombëtare dhe thanë se nuk do të vijnë. Në kombëtare duhen lojtarë që e meritojnë.
Gjithçka është në bazë të meritës, le të mërziten me mua sa të duan. Kjo është puna e tyre. Për sa kohë jam këtu, vendos unë se cili do të luajë. Futbollistët duhet të më tregojnë se e meritojnë të jenë këtu”, u shpreh Stojkovic.
Serbia do të luajë me Shqipërinë më 7 qershor, ndërsa është pjesë e grupit kualifikues me Anglinë, Andorrën dhe Letoninë.
