Presidenti i Skënderbeut, Ardjan Takaj, ka shumë arsye me të cilat mund të krenohet për ekipin e tij. Përveçse është kampion në fuqi prej gjashtë sezonesh, Takaj po sheh ditaditës se si po rriten lojtarët dhe po kthehen në një pasuri të madhe për klubin korçar.
Rasti i fundit është grumbullimi me Kombëtaren i Liridon Latifit, por mbi të gjitha dy golat e shënuar me fanellën e Shqipërisë U19 nga talenti i ri i Skënderbeut, Agim Zeka, i cili ndëshkoi Gjermaninë. Dopieta e Zekës u prit mjaft mirë në kampin korçar, mbi të gjitha nga menaxherët e klubit, të cilët shohin si një rritje të vlerës së kartonit të lojtarit, i cili ka një kontratë afatgjate me Skënderbeun.
Këtë sezon Zeka është grumbulluar me ekipin e parë dhe duket se nuk do të jetë e largët dita kur klubi të shesë kartonin e lojtarit. Skënderbeu ka dëshmuar në vitet e fundit se di t’i shesë “xhevahirët” e tij. Rasti i parë ka qenë ai i Bernard Berishës dhe Peter Olainkës. Kosovari i transferuar tek Anzhi solli diçka më shumë se 250 mijë euro në klubin bardhekuq.
Nga ana tjetër, Olainka me kalimin e tij te Gent, çoi në arkat e klubit një shifër rekord prej 1.1 milionë euro. Kjo është rruga që Skënderbeu pretendon të ndjekë edhe për të paktën nëntë lojtarë që janë aktualisht pjesë e skuadrës. I pari në listën e transferimeve prej disa muajsh qëndron Liridon Latifi, i cili ishte pranë kalimit në verë te Rostov në Rusi.
Ky transferim dështoi në minutat e fundit, por duket se klubi po punon për të bërë fakt shitjen e Latifit në janar. Në skenë tashmë ka dalë edhe Astana, klubi kampion në fuqi i Kazakistanit. Talenti i grumbulluar edhe nga De Biazi, me shumë mundësi, do të firmosë me klubin e tij të ri në muajin janar, por largimi nga Skënderbeu do të bëhet vetëm në qershor. Në listën e lojtarëve që klubi synon të shesë janë edhe emra si Bajram Jashanica, Gledi Mici, Bruno Lulaj, Bakari Nimaga, Sabjen Lilaj, Ardit Hoxhaj dhe Xhejms Adeniji. Interesimi për ta është gjithnjë e në rritje./Panorama SPORT
