Stadiumi i Gramshit “Myslim Koçi” do të rikonstruktohet falë një bashkëpunimi mes Federatës së Futbollit dhe Bashkisë së qytetit.
Marrëveshja u nënshkrua përmes një ceremonie zyrtare në ambientet e “Shtëpisë së Futbollit” nga presidenti i Armand Duka dhe kryebaskiaku Besion Ajazi.
Në stadium do të rikonstruktohen dhoma të zhveshjes dhe pajisjet, si edhe do të shtrohet tapet me bar artificial.
Presidenti Duka deklaroi se ky është vetëm një nga projektet që institucioni i futbollit ka.
“Sot është një ditë e rëndësishme për futbollin e qytetit të Gramshit kryesisht, por edhe për futbollin në përgjithësi. Sot në “Shtëpinë e Futbollit” do të nisim projektin e rikonstruksionit të stadiumit të qytetit të Gramshit dhe do të diskutojmë me kryetarin e Bashkisë edhe për projektet e reja. Më saktë kemi filluar të diskutojmë sepse Bashkia e Gramshit është një nga Bashkitë që qëndron më afër futbollit dhe për këtë dua ta falënderoj kryetarin e Bashkisë për kontributin e tij jo vetëm në ndryshimin e infrastukturës dhe në bashkëpunimin me ne por edhe për mbështetjen e skuadrave, kryesisht skuadrës së vajzave. Kjo është një dëshmi e qartë e kujdesit të FSHF-së për përmirësimin e infrastrukturës në përgjithësi në çdo cep të Shqipërisë në bashkëpunim me Bashki apo individë që janë të gatshëm të investojnë për përmirësimin e kushteve të lojës” – tha Presidenti Duka në fjalën e tij.
Klan News
