Policia e Beratit ka arrestuar dy persona në vijim të operacionit të koduar “Kredia”, i finalizuar në janar 2020, duke e çuar në 8 numrin e të arrestuarve dhe të proceduarve penalisht.
Konkretisht janë ndaluar shtetasit E. I., 26 vjeç dhe F. D., 26 vjeç, të dy banues në Kuçovë.
Nga hetimet disamujore të kryera janë siguruar prova bindëse për veprimtarinë kriminale të këtyre 2 shtetasve, në bashkëpunim me shtetasin e arrestuar gjatë operacionit dhe bashkëpunëtorët e tjerë që janë shpallur në kërkim.
Këta shtetas përvetësonin shuma të hollash me anë të mashtrimit, duke nënshkruar edhe kontrata huaje në emër të një shoqërisë me objekt veprimtarie dhënie kredie, me qëllim përvetësimin e shumave të lekëve, gjë për të cilën kjo shoqëri nuk kishte dijeni.
Materialet procedurale në ngarkim të këtyre shtetasve do t’i kalojnë Prokurorisë pranë Gjykatës së Shkallës së Parë Berat, për veprime të mëtejshme procedurale, për veprat penale “Mashtrim më shumë se një herë” dhe “Falsifikim i dokumenteve”. /Opinion.al
